ილიას სახელმწიფო უნივერსიტეტის სამართლის სკოლის ადამიანის უფლებათა კლინიკა 2018 წელს აშშ-ის საერთაშორისო განვითარების სააგენტოს (USAID) პროგრამის „კანონის უზენაესობის მხარდაჭერა საქართველოში“ (PROLoG) მხარდაჭერითა და ნორთვესტერნის უნივერსიტეტთან (ილინოისის შტატი, აშშ) თანამშრომლობის ფარგლებში დაფუძნდა. ადამიანის უფლებათა კლინიკა კლინიკური იურიდიული განათლების ამერიკული მოდელის მიხედვით ფუნქციონირებს და წარმოებული საქმეების წარმატებისა და მრავალფეროვნების გათვალისწინებით, საქართველოს უმაღლეს საგანმანათლებლო დაწესებულებებში არსებულ კლინიკებს შორის ერთ-ერთ წამყვან იურიდიულ კლინიკად მიიჩნევა. 

ილიას სახელმწიფო უნივერსიტეტის ადამიანის უფლებათა კლინიკა უფასო იურიდიულ დახმარებას უწევს იმ პირებს, რომელთა მიმართაც განხორციელდა სხვადასხვა სახის უფლებადარღვევა, მათ შორის დისკრიმინაციის ან/და ძალადობის მსხვერპლ მოქალაქეებს, მოწყვლადი ჯგუფების წარმომადგენლებს. საქმეების წარმოების გარდა, კლინიკას სხვადასხვა პოლიტიკის დოკუმენტის, მათ შორის სამუშაო ადგილზე დისკრიმინაციის აკრძალვის, სექსუალური შევიწროების აკრძალვისა და პრევენციის დოკუმენტების მომზადების გამოცდილებაც აქვს. ადამიანის უფლებათა კლინიკის საქმიანობის ერთ-ერთ მთავარ პრინციპს კონფიდენციალურობის პოლიტიკის დაცვა წარმოადგენს, რაც კლინიკის მიმართ ნდობის ერთ-ერთი მთავარი საფუძველია. 

ადამიანის უფლებათა დაცვის მიზნებისთვის კლინიკა იყენებს როგორც ეროვნულ, ასევე საერთაშორისო დონეზე არსებულ სხვადასხვა სამართლებრივ მექანიზმს, მათ შორის გაერთიანებული ერების ორგანიზაციისა და ევროპის საბჭოს ორგანოებისთვის ჩრდილოვანი ანგარიშების წარდგენას. საქართველოში კლინიკური იურიდიული განათლების ხელშეწყობისთვის, საერთაშორისო გამოცდილებისა და საუკეთესო პრაქტიკის გაზიარებისთვის/დანერგვისთვის, ადამიანის უფლებათა კლინიკა მონაწილეობს ეროვნულ და საერთაშორისო სამეცნიერო და კლინიკური იურიდული განათლების კონფერენციებში. კლინიკა ასევე წარმოადგენს კლინიკური იურიდიული განათლების ევროპული ქსელის (ENCLE) წევრს.

ადამიანის უფლებათა კლინიკის მიზანს წარმოადგენს სწავლების გამოცდილებით/პრაქტიკულ მიდგომაზე დაყრდნობით სტუდენტების  პროფესიული და კვლევითი უნარების გაღრმავება, სამართლებრივი და აკადემიური წერის სტანდარტების განვითარება, კრიტიკული აზროვნებისა და იმ ღირებულებების ჩამოყალიბება, რომლებიც ადამიანის უფლებათა სპეციალისტებისთვის აუცილებელია. ადამიანის უფლებათა კლინიკური კურსი ბაკალავრიატის საფეხურის დამამთავრებელი კურსის სტუდენტებისთვის 6 (ECTS) კრედიტიანი, ხოლო მაგისტრანტებისთვის – 18 (ECTS) კრედიტიანია. 

ადამიანის უფლებათა კლინიკის საქმიანობის ფარგლებში სამართლის სკოლის სამაგისტრო და საბაკალავრო საფეხურების სტუდენტები კვალიფიციური იურისტების სუპერვიზიის ქვეშ გასცემენ უფასო იურიდიულ კონსულტაციას, ამზადებენ როგორც სტრატეგიულ და კვლევით, ასევე იურიდიულ დოკუმენტებს (განცხადება, სარჩელი, საჩივარი), აწარმოებენ საქმეებს როგორც ადმინისტრაციულ ორგანოებში, ასევე საკონსტიტუციო და საერთო სასამართლოებში, სახალხო დამცველის აპარატში, შრომის ინსპექციაში, კომუნიკაციების ეროვნულ კომისიაში და სხვ., მონაწილეობას იღებენ ადამიანის უფლებათა დარღვევების შესახებ საერთაშორისო ორგანიზაციებისთვის ჩრდილოვანი ანგარიშების მომზადებაში.

ადამიანის უფლებათა კლინიკა წლის განმავლობაში 50-მდე საქმეს აწარმოებს, რომლებიც მოიცავს სამართლის სხვადასხვა მიმართულებას, მათ შორის სქესის, ასაკის, შეზღუდული შესაძლებლობის, ეთნიკური, გენდერული ნიშნით დისკრიმინაციას, სექსუალურ შევიწროებას/შევიწროებას, მაუწყებლობისა და ჟურნალისტური ეთიკის პრინციპების დაცვას, ჯანმრთელობისა და განათლების უფლებაზე ხელმისაწვდომობას, შრომითი უფლებების დაცვას, დაზღვევის სამართალს, ქალთა რეპროდუქციულ უფლებებს, პერსონალურ მონაცემთა დაცვას და სხვ.

კლინიკის მიერ წლის განმავლობაში წარმოებულ საქმეებში წარმატებით დასრულებული საქმეების ხვედრითი წილი მაღალია (70%-ზე მეტი), რომელთა შორისაც აღსანიშნავია სადაზღვევო ანაზღაურების, მაუწყებლობის ეთიკური პრინციპების დარღვევის, სექსუალური შევიწროების, სქესის და ასაკის ნიშნით დისკრიმინაციისა და პერსონალურ მონაცემთა დამუშავების პრინციპების დარღვევის საქმეები.